Skömm því jafnvel Eiríkur Fjalar gæti betur.

Í dag sannaði sá hópur fólks, sem gekk undir heitinu ríkisstjórn Íslands, að hann lýtur ekki íslenskri þjóð, eða íslenskri stjórnskipan.  Ef húsbændur hans eru þessa heims, þá eru þeir í það minnsta ekki íslenskir.

Maður skilur ekki til hvers bretar og  Hollendingar eru að úttala sig um afleiðingar þess að forseti Íslands skuli standa með þjóð sinni og stjórnarskrá.  Jafnvel hörðustu yfirlýsingar breta eru eins og hugljúf sunnudagshugvekja hjá KFUM, miðað við þá dökku mynd sem hópurinn, sem ranglega er kenndur við þjóð okkar, hefur dregið upp í fjölmiðlum, jafnt innlendum sem erlendum.

Það er eins og þessi grey hafi ekki getað hugsað þá hugsun að benda umheiminum á að þjóðin sætti sig ekki við ólöglega kúgun og þjófnað hins breska heimsveldis, og aftanítossa þeirra á flóðasvæðum Ermasunds.  Að það sé ekki hægt að bjóða þjóðinni upp á hvað sem er.

Nei, i stað þess að benda á einfaldar staðreyndir, þá er vælt og skælt, og trölla og draugsögur sagðar.  Og áhrifin láta ekki á sér standa.  Ég las það á einu Samfylkingarbloggi áðan, að blessuð konan ætlaði að flytja úr landi ef hún fengi ekki að borga af ICEsave.  Hún hafði svo miklar áhyggjur af því að hér yrði ekki skortur og fátækt, hafði lengi dreymt um, eða allt frá  því í okt í hittifyrra, dreymt um  að upplifa vöruskort og skömmtunarseðla, eins og hún langamma hennar upplifði á Kreppuárunum hinum fyrri.

Núna, á að nota gjaldeyristekjur þjóðarinnar í að borga fyrir innflutning og greiða af lánum fyrirtækja og sveitarfélaga, í stað þess að nota þær til að aðstoða breska skattgreiðendur í þrengingum þeirra.

Og blessuð konan meinti hvert orð af því sem hún sagði.

Og hvað getur fólk, sem ekki trúir á drauga og tröll, sagt við þessari múgæsingu.  Ekki þýðir lengur að segja eins og Skrámur, "breta hvað", því ekki eru það bretar sem skelfa fólk með rangfærslum og blekkingum.

En eitt er ljóst, að þjóð sem hefur svona hóp fólks, sem ranglega er kennt við ríkisstjórn Íslands, til að tala máli sínu, að hún þarf að hafa gott skopskyn, til að hausahristingur yfir allri vitleysunni gangi ekki fram úr öllu hófi.  

En það þarf enginn óvini, sem hefur svona hóp fólks, sem heldur að það sé sverð vor og skjöldur, til að gæta hagsmuni sína.  

En hvers eiga hagsmunir þjóðarinnar að gjalda?

Er Eiríkur Fjalar á lausu, eða þá hann Dolli.

Kveðja að austan.

 

 

 

Segir stjórnina starfa áfram