Þórdís Kolbrún tekin í kennslu á degi íslenskrar tungu.

 

Tilefnið er auglýsing Sjálfstæðisflokksins, samin af fólki sem veit ekki hvernig börnin verða til, og kann því ekki lengur að tala íslensku, hvorki rétta eða ranga, því kynlaus íslenska er ekki íslenska, ekki frekar en jarm í kindum, þó óþarfi hafi verið hjá Sigmundi að láta jarmið fylgja með rökstuðningi sínum.

Það er vissulega töluð kynlaus mál í heiminum, en þau eru jaðarmál, tilheyra ekki stóru málaflokkunum eins og til dæmis íslenska sem er indó-evrópskt mál.

 

Hins vegar geta verið rökréttar skýringar á því að bjóða öll velkomin í Valhöll, núna þegar hægrikratarnir sem slátruðu hægrimönnum á kjördæmisþingum flokksins, sjá að þeir hafa fælt yfir helming af kjarnakjósendum flokksins yfir til annarra flokka.

Kannski fá dýr kosningarétt mjög fljótlega, það er stutt frá því að vita ekki hvernig börnin verða til, til þess að gæludýr og húsdýr fái slíkan rétt, því ef þú ert á annað borð búinn að segja skilið við alla heilbrigða skynsemi, þá er fá vitleysan sem þér getur ekki dottið í hug, og barist fyrir.

Hugmyndin er þá að venja dýrin strax við með því að bjóða þau velkomin í Valhöll, þau myndu þá setja loppu eða gogg á X-D í kjörklefanum.

 

Hlálegast við þessa kynlausu auglýsingu Sjálfstæðisflokksins og síðan vörn Þórdísar Kolbrúnar, sem má lesa um í viðtengdri frétt, er brandarinn þegar Brynjar Níelsson lét Unga Sjálfstæðismenn taka mynd af sér með skilti sem á stóð; Burt með Woke kjaftæðið eða eitthvað álíka.

Hverja eru menn eins og Brynjar, sem láta allt yfir sig ganga af höndum Samfylkingarkratanna, að blekkja með slíkum gjörningi??

 

Íhaldsmenn, sem geta ekki hugsað sig að kjósa Samfylkingarkratana, eða sig sjálfan.

Eða er þetta réttlæting hans að lifa með því að þurfa lúta boðvaldi liðs sem talar ekki einu sinni lengur íslenska tungu.

 

Sjálfstæðisflokkurinn er kominn í kviksyndi pólitísks rétttrúnaðar.

Eina stefnumál Sjálfstæðisflokksins fyrir næsta kjörtímabil, stefnumál sem er ekki innantóm loforð, er að koma íslensku þjóðinni í hjáleigusamband við Brussel með samþykkt bókun 35.

Með öðrum orðum, skýlaust brot á stjórnarskránni er eina stefnumál flokksins.

 

Svo blása menn bara í lúðra eins og Brynjar Níelsson og trúa því að einhver trúi þeim lúðrablæstri.

Kannski einhverjir en ég efa stórlega að væntanleg dýr með kosningarétt geri það.

Því dýr eru nefnilega skynsöm, vita sínu viti eins og sagt er.

 

Það sama verður ekki sagt um þær sem eiga að erfa landið í Sjálfstæðisflokknum.

Fylgi flokksins segir allt þar um.

Kveðja að austan.

Takast á um „woke-afbökun íslenskunnar“

Eru nýir tímar í nánd??

 

Frá því að eldri menn muna virðist einn helsti metnaður Loga Einarssonar, þingmanns okkar Austfirðinga hafi verið að enda sem heiðursmaður á lista Pírata, og í þeirri viðleiti hefur hann slegið Pírata ítrekað út í upphlaupsumræðum á Alþingi með innihaldslausri froðu og hávaða.

 

En í þessari frétt sýnir Logi á sér nýja hlið.

Hún hefur örugglega verið til, en horfið algjörlega í skuggann af hávaðastjórnmálunum sem Logi sérhæfði sig í.

 

Vil vitna í Loga; "Flokk­ur­inn í borg­inni hef­ur alltaf skilið það – og hluti af sam­komu­lag­inu við innviðaráðherra er það – að flug­völl­ur­inn verði þar sem hann er þar til að jafn góður eða betri kost­ur er til­bú­inn, seg­ir Logi".

Sé það rétt hjá Loga að borgarstjórnarflokkur Samfylkingarinnar hafi alltaf skilið þessi einföldu sannindi, en augljóslega ekki farið eftir, þá er aðeins einu að bæta við þessa færslu.

Orðin sem Logi hefði átt að enda viðtal sitt á, en ég get alveg sagt fyrir hann;

 

Dagur, skammastu þín.

Og þó fyrr hefði verið.

Kveðja að austan.

Allt annar tónn hjá landsbyggðarþingmönnunum