Meðvirkir meðreiðasveinar.

 Orðið geðvillingur er skilgreint svona í Britannicu, "a person affected with antisocial personality disorder".  Og þeir eru fjölmargir sem þjást af þessu kvilla, og því miður gerist það að nokkrir þeirra komast í þá aðstöðu að gera öðrum illt.

Og ferlið er alltaf keimlíkt, í nafni einhverra háleitra markmiða er líf fólks umturnað, samfélögum þeirra ógnað,  og í kjölfarið fylgja oft miklar hörmungar, hungur, mannfellir, fjöldamorð.  

Frægustu geðvillingar síðustu aldar eru þeir félagar, Stalín, Maó og Hitler, en margir minni spámenn voru ekki síðri í vilja en skorti aðstæður eða getu til að toppa þá þrjá stóru.  Má þar nefna menn eins og Pol Pot, Kim ll Sung og Nicolae Ceausescu.

 

En það að þessir  geðvillingar urðu svona frægir segir dálítið ljótt um mannkynið, það á það til að vera meðvirkt, og ekki aðeins að láta svona hegðun yfir sig ganga, heldur og hitt að þessir einstaklingar frömdu ekki glæpi sína sjálfir.

Meðvirkir meðreiðasveinar gerðu það í þeirra nafni.  Og það var venjulegt fólk en lét samt hafa sig út í óhæfuverkin.  Í bók sinni, "Ég kaus frelsið" lýsir  Victor Kravchenko þátttöku sinni í aðför Stalíns að smábændum Úkraínu á fjórða áratug síðustu aldar.  Markmiðin voru háleit, það átti að taka upp vísindalega sósíalíska stjórnun á landbúnaðarframleiðslu og taka upp samyrkjubúskap, og til þess þurfti að brjóta á bak aftur stórbændur eða kúlakka, en restin af bændalýðnum átti að koma sjálfviljugt á búin.

Raunveruleikinn var annar, hinir meintu stórbændur voru lítill hluti bændalýðsins, fólkið fór ekki sjálfviljugt og því var nauðung beitt.  Aftökum, ógnunum, skipulagðri hungursneyð.  Afleiðingin var gífurlegur mannfellir og fæðuframleiðsla þjóðarinnar varð aðeins brot af því sem hún var fyrir.  Það sem er átakanlegast í lýsingum Victors er sá kuldi sem hrjáði þetta unga fólk sem kom úr borgunum og í nafni hugsjóna rændi matvælum frá sárfátækum bændum vitandi að þeir myndu ekki lifa af veturinn.  

Það trúði, það var meðvirkt í einum mestu hörmungum mannkynssögunnar.  Það hefði kinnroðalaust reynt að eyðileggja tilraunir skynsams fólks innan núverandi ríkisstjórnar með því að birta sem fyrstu frétt úrtöluvæl geðvillings um að ekki sé hægt að leiðrétta ranglæti Auðmannaránsins því réttur auðmanna og auðræningja væri æðri rétti almennings, skoðun sem er nútíma útfærsla af kenningum Stalíns.

 

Geðvillingar þurfa ekki að ástunda fjöldamorð til að valda þjóðum sínum miklum tilbúnum hörmungum.  Dæmi frá síðustu tímum er eyðilegging heilbrigðisþjónustu og annarrar grunnþjónustu og skuldaþrælkun þegna sinna svo hægt sé að standa í skilum við erlenda lánardrottna vegna lána sem þessir þegnar höfðu ekkert með að segja.  Það dæmi endaði hörmulega fyrir aðalgerendur þess glæps.  Átakanleg eru orð Elenar Ceausescu, "ég var ykkur sem móðir".   Hún skyldi ekki það hatur sem að henni beindist, hún hélt að fólki líkaði það vel að vera meðhöndlað sem skepnur.

 

Ennþá nýrra dæmi umgerðir geðvillinga eru aðgerðir Alþjóðagjaldeyrissjóðsins í Argentínu um aldamótin þegar sjóðurinn notaði tækifærið þegar lofsungin (af hugmyndafræðingum AGS), en kolvitlaus efnahagsstefna fastgengis hrundi.  Þá vann sjóðurinn markvisst að því með aðstoð þarlendra hagfræðinga og stjórnmálamanna að koma landinu aftur á steinaldarstig.  Lagt var upp með efnahagsstefnu með afleiðingum sem voru mjög svipaðar og sjóðurinn gerði hér, að skuldabyrði ríkisins yrði um 60% af tekjum og greiðslubyrði erlendra lána yrði svipað hlutfall og hér, eða 160 milljarðar af um 400 milljarða tekjum, sem er næstum allur nettó afgangur þjóðarbúsins svo ekkert er afgangs í það sem kalla má eðlilega neyslu landsmanna.

Þar féll náttúrulega allt sem fallið gat og jafnvel fólk í fullri vinnu gat ekki framleitt sér.  Hagkerfið tók mjög skarpa dýfu niður á við, þvert á hin fögru orð sem lagt var á stað með í upphafi.  Afleiðingin var tekjufall ríkisins, og í stað þess að bregðast við með því að slaka á greiðslubyrðinni, þá kom skilaboð geðvillinganna, þið verðið að skera meira niður.

Og það gátu stjórnvöld í Argentínu ekki gert.  Þau ráku sjóðinn úr landi og notuðu mannvit, ekki geðvillingavit, til að vinna bug á efnahagskreppunni.  Öskuhaugarnir tæmdust að fólki, atvinnuleysið snarminnkaði, fólk fékk aftur heilsugæsluna sína, og ekki hvað síst, það fékk framtíða án skuldahlekkja.

 

Svona er sagan og núna erum við komin í nútímann.  Um aðför íslenskra geðvillinga í skjóli þeirra stóru hjá Alþjóðagjaldeyrissjóðnum.  Við fáum fréttir af falli heimila, að falli fjölskyldna, að fyrirhugaðri aftöku heilbrigðisþjónustunnar.  Þó vitum við að samkvæmt læknaskýrslum þá eru geðvillingar innan við 1% þjóðarinnar.  

Hvað veldur???

Svarið er auðvitað eins og hjá Stalín, hinir Meðvirku meðreiðasveinar.  Þeir fylla fjölmiðlana, þeir fylla háskólana, þeir eru hjá samtökum atvinnulífsins og á skrifstofum verklýðsfélaganna.  Þeir eiga það allir sammerkt að vegna annarlega hagsmuna eða blindrar hlýðni við stjórnmálaflokka sína þá styðja þeir kinnroðalaust helstefnu gagnvart þjóð sinni.

Þeir tala um nauðsyn niðurskurðar, og skera þá ekki niður  flottræfilshátt heldur grunnþjónustu heilsugæslunnar á landsbyggðinni.  Þeir ljúga því til að fjárkúgun breta sé skuld þjóðarinnar, þeir segja að það sé efnahagsráðstöfun að taka rislán hjá AGS sem þjóðin mun aldrei geta borgað til baka nema með skuldaþrældómi og afsali efnahagslegs sjálfstæðis síns.

 

Og þeir hlæja að þjáningum ungs fólks sem varð það á að vilja viðhalda þjóð sinni og koma þaki yfir höfuð fjölskyldu sinnar.  Og í hvert skipti sem andstaða þjóðarinnar við skuldaþrældóm og þjáningar kemst á það stig að stjórnvöld neyðast til að hlusta á kröfur þjóðarinnar, þá byrjar þetta lið útburðarsöng sinn.

Söngurinn um að það sé verið að hjálpa Range Rover kaupendum, óráðsíufólki eða það sem er heimskulegast að þessu öllu, að það sé alltof dýrt að hjálpa þessu unga fólki.  Eins og það geti nokkurn tímann verið of dýrt fyrir þjóð að bjarga sjálfri sér.

 

Það má spyrja sig hvort heimska ráði för þessara meðreiðasveina, að þeir skilji ekki hvað 60% skuldahlutfall þýðir eða hvað áhrif það hefur á lífskjör þjóðarinnar að um 160 milljarðar fari í afborganir af ICESave, AGS og öðru því sem þeir vilja ólmir láta þjóð sína borga fyrir sig, en er hægt að útskýra það sem heimsku að þetta fólk heyrir ekki neyðaróp náungans sem er að kikna undan skuldabyrði sinni????

Er það heimska að tala um nauðsynlegan niðurskurð sem felst í því að rústa samfélögum eins og tillögurnar um afleggingu sjúkrahúsþjónustu á landsbyggðinni hefur í för með sér.  Sérstaklega þegar ljóst er að um engan sparnað er að ræða og ekkert það hefur gerst í efnahagslífi þjóðarinnar sem réttlætir þessa aðför. 

Er það heimska að skilja ekki að það má ekki gera meðbræðrum sínum illt eins og gert er með því að neita skuldugu fólki um hjálp og horfa síðan með glott á vör þegar fjölskyldur sundrast eða eru neyddar á götuna, eða þeim bjargað með lífstíðarskuldaþrældómi.

Er þetta heimska, stórkostleg heimska sem fá dæmi eru um í mannkynssögunni, eða eru þessir meðvirku meðreiðasveinar líka geðvilltir???

Eru þeir aðeins mini mini útgáfa af leiðtogum sínum.

 

Við þeirri spurningu á ég ekkert svar og eftirlæt þeim sem hafa fylgt mér allan þennan pistil til að skera úr um. 

Stundum er það þannig að þegar líf manns og framtíð er í húfi, þá verður maður að leggja það á sig að setja sig inn í samhengi hlutanna, og skilja að það sem er að gerast núna, hefur gerst áður.

Og svarið er alltaf það sama, annaðhvort láta menn rústa samfélögum sínum án mótspyrnu, eða menn rísa upp, og verja sig og fjölskyldur sínar.

Geðvillingar eru ekki guðir, þeir eru ómenni sem eiga að vistast á viðeigandi stofnunum, en þeir eiga ekki að stjórna, hvergi.

Og það er okkar að sjá til þess.

 

Látum ekki bjóða okkur þetta.  Við erum þjóðin.

Berum Útburðinn út.

Kveðja að austan. 

 

 

 

„Niðurfærsla mun ekki leysa hvers manns vanda“

Athugasemdir

[Elle_, 11.10.2010 kl. 11:30]

Sterkur pistill, Ómar.  Stal honum og nú er hann í hávegum hafður með öllum hinum stolnu pistlunum.  Kveðja að sunnan. 

[Jonsi (IP-tala skráð) 11.10.2010 kl. 11:54]

Fullkomlega sammála, þjóðfélagið og bankarnir ríku getur alveg borið smá niðurgreiðslu hjá þeim mest skuldugu. Ráðumst í þetta bara!  Bankarnir og ríkið eru þegar búin að fá svo mikið niðurfellt af sínum skuldum.  Þessu á að framlengja til okkar almennu borgara.  Þetta er allt svo einfalt,

 hversvegna finna þeir ekki bara út úr því hverjir eiga mest skilið að fá niðurfærslu skulda, og niðurfæri svo bara í stórum stíl? Smábarn gæti útbúið slíkt plan fyrir ríkisstjórnina. Rosa einfalt!

[Ómar Geirsson, 11.10.2010 kl. 12:06]

Sælir eru einfaldir því þeir munu landið erfa, naglann á höfuð hittir þú Jonsi.

Elle, ég veit að hann er sterkur þó niðurlagið sé ósjálfráð skrift, það er vegna þess að kona mín var alltaf að trufla mig, smá tölvuvandamál.

Og þó mér bæði leiðist mjög að hugsa áður en ég skrifa sem og hitt að eftirspurn er í lágmarki, þá þarf einhver að vekja athygli á að harmur okkar er brot af heimsins harmi.

Og sú hörmungaslóð sem við fetum, er þekkt slóð, mörkuð af illvilja fólks sem telur sig hafa rétt á að rústa samfélögum og valda meöbræðrum sínum hörmungum, líkt og þeir væru náttúruafl eins og fellibylir eða jarðskjálftar.

Og við svona fólk er ekki rætt eins og Churchil margítrekaði, það skilur aðeins stálið.

Og núna á ég aðeins einn pistil eftir Elle, hann átti að vera kominn en heimska Dell talvan (hún er samt ekki geðvillt en vill ekki tengjast netinu) hefur frestað honum eitthvað, kannski til morguns.  

Og um hvað fjallar pistillinn, það er nú spurningin, en hann byrjar á einu sinni var.

Kveðja að austan.