Trúverðugleiki er auðlind.

 

Sem fæst ekki keypt útí búð.

 

Mér minnisstæð ein saga frá unglingsárum mínum þegar drengur einn góður, jafnaldri minn, gat ekki sinnt vinnu sinni einn daginn því hann þurfti að rúnta um bæinn og segja nýjustu fréttina, þetta var fyrir daga Séð og Heyrt og Smartlands, og þegar hann fann að honum var lítt trúað, þá sagði hann; "þetta er alveg satt, ég er ekki að ljúga".  Eins og að hann gerði sér grein fyrir að hann hefði orð á sér að skálda upp sögur.

Hann hafði nefnilega glatað trúverðugleik sínum.

 

Þjóðverjar lentu í þessu sama þegar þeir kölluðu til Rauða Krossinn og erlenda sendifulltrúa (Sviss) og sýndu þeim líkamsleifar allt að 20.000 hertekinna pólskra liðsforingja sem þeir sögðu að Rauði herinn hefði myrt eftir uppgjöf Póllands.

"Við gerðum þetta ekki", vitandi uppá sig skömmina að þeir hefðu alveg getað framið slíkt illvirki.

Og þeim var ekki trúað, þeir höfðu logið of miklu, of oft, of ítrekað.

Vandi alræðisstjórna fyrr og síðar, þeim er ekki trúað því sannleikurinn er valkvæður, aðeins nýttur þegar hann hentar.

Hafa engan trúverðugleik.

 

Bandaríkin, þetta forystuland vestrænna lýðræðisþjóða, naut þess að umgjörð lýðræðisins gerir ráð fyrir sannsögli ráðamanna, bæði veita frjálsir fjölmiðlar aðhald, slíkt er hlutverk stjórnarandstöðu, og víða varðar það við lög, til dæmis í Bandaríkjunum en ekki á Íslandi, að ljúga að þjóðþingi.

Í Kalda stríðinu naut Bandaríkin þess að þeim var trúað miklu frekar en Sovétmönnum, og þó oft væri reynt á þann trúverðugleik, til dæmis í Víetnam stríðinu, að þá treysti fólk því að á ögurstundu í ögurmálum sögðu leiðtogar þess satt.

Þess vegna var þeim trúað í aðdraganda innrásarinnar í Írak, þó strax hringdu aðvörunarljós þegar það átti að hengja illvirki Alkaida á Saddam Hussein, þeir sem fylgdust með alþjóðlegum fréttum vissu annars vegar að veraldlegu einræðisherrarnir í arabaheiminum litu á íslamska bókstafstrú sem ógn, og Islamistar voru réttdræpir í löndum eins og Írak og Sýrlandi, hins vegar að allir þræðir árásanna á Tvíburaturnanna lágu til Ryad höfuðborgar Sádi Arabíu.  Sem og það er vitað að Sádar fjármagna hatursorðræðu og öfga í moskum um allan heim, sérstaklega á Vesturlöndum.

 

Ríkisstjórn Bush kaus hins vegar að ráðast inní Írak á fölskum forsendum, hver sem ástæðan var, þá var hún aldrei gefin upp, heldur aðeins uppdiktaður sögur um gjöreyðingarvopnaeign Saddams og logið upp tengslum við Islamista og hryðjuverk þeirra.

Og þegar heimsbyggðin áttaði sig á því að þetta var allt saman lygi, þá misstu bandarísk stjórnvöld trúverðugleik sinn, þeim var ekki treystandi að segja satt á ögurstundu, og beittu afli sínu til að telja stuðningsfólki eða fylgjendum sínum í trú um að lygi væri sönn, fóru þar í brunn áróðursmeistara alræðisríkjanna, að markaðssetja lygina sem sannleik þegar það hentaði.

 

Donald Trump segir í dag að Íranar hafi ætlað að ráðast á fjögur bandarísk sendiráð og til að hindra þær árásir hafi verið nauðsynlegt að drepa herforingjann sem skipulagði þessar árásir.

Þetta vekur uppi tvennar spurningar, af hverju yfir höfuð ættu Íranar að standa í slíku veseni og til hvers, sem og hefur Donald Trump sagt satt orð í þessu máli eftir að hann fyrirskipaði launmorðið á Soleimani.

Fyrri spurningin reynir aðeins á heilbrigða skynsemi fólks (sem allir hafa þó margir kjósi vissulega að afneita henni), af hverju ættu Íranar núna að vera skipuleggja slíkar árásir uppúr þurru og hver er ávinningur þeirra??

Það er ekki hægt að vísa í söguna, og ef menn ætla sér að efna til ófriðar, taka menn þá uppá því að ráðast á best vörðu húsakyn heimsins í dag, sem þar að auki innlend stjórnvöld bera ábyrgð á öryggisgæslu??

Slíkt er óðs manns æði, og það er ekkert sem bendir til þess að sá launmyrti, eða aðrir ráðamenn Írans séu óðir, þeir virðast tefla sína stórveldisskák (þeir eru stóra ríkið á svæðinu) nokkuð örugglega og út frá þeirra forsendum og styrk, skynsamlega.

 

Gæti samt verið, en þá reynir á trúverðugleika Trumps.

Hann hélt ræðu eftir launmorðið þar sem hann útskýrði tilræðið og þar var ýmislegt fullyrt.

Hér á Moggablogginu er ákaflega vandað blogg þar sem höfundurinn Einar Björn Bjarnason er víðlesinn, fjallar ítarlega um einstök efni og vísar iðulega í skrif og heimildir í pistlum sínum áður en hann dregur af þeim ályktanir.

 

Þetta er það sem Einar segir um hvernig Trump höndlar sannleikann;

"Úr ræðu Tumps.

As the head of the Quds Force, Soleimani was personally responsible for some of the absolutely worst atrocities...He viciously wounded and murdered thousands of U.S. troops, including the planting of roadside bombs that maim and dismember their victims.

Ræða Trumps er afar sérkennileg -- hann virðist kenna Quassem Soleimani um dauða sérhvers bandarísks hermanns, sem farist hefur -- síðan formlegu stríði lauk í Írak eftir innrás 2003. --En þ.e. eina leiðin sem ég fæ fullyrðingu hans, um dauða þúsunda hermanna, að ganga upp.

En Bandaríkin sannarlega urðu fyrir töluverðu manfalli, í Írak - þegar átök þar voru við al-Qaeta, og einnig í Afganistan þ.s. átök hafa verið við Talibana. --En þ.e. algerlega absúrd, að tengja dauða þessara hermanna við Íran. Eina skiptið sem hugsanlega má tengja dauða bandar. hermanna við Íran -- er á 9. áratug 20. aldar, Lýbanon sprengjutilræði framkv. af Hezbollah. --En það var auðvitað löngu áður en Quassem Suleimani kom við sögu.

Vandamál við tal Trumps -- er hvað það er oft fullt af - bullshit.

Soleimani directed the recent attacks on U.S. personnel in Iraq that badly wounded four service members and killed one American, and he orchestrated the violent assault on the U.S. embassy in Baghdad.

Hópur íraskra Shíta reyndi að storma bandar. sendiráðið í Írak - það var eldflauga-árás á bandar. herstöð sem rakin er til annars vopnaðs shíta hóp í Írak. --Ef Trump hefur einhverja réttlætingu fyrir drápi á Soleimani, þá er það dauði þessa eina hermanns. Bandaríkin hafa lengi haft þá stefnu að hefna harkalega fyrir -- fall á eigin hermanni. Hinn bóginn sé venja að -- senda sprengjur á einhverja herstöð þess lands, sem talið er bera ábyrgð -- ekki að drepa einn af helstu leiðtogum þess. A.m.k. man ég ekki eftir nokkru dæmi þess, Bandar. hefni sín með nákvæmlega þessum hætti - þegar einn maður fellur. --Þegar Bandaríkin eru ekki í formlegu stríði.

Hinn bóginn, hafa fullyrðingar Trumps á þann veg Soleimani beri ábyrgð á dauða -- þúsunda bandar. hermanna í gegnum árin, engin veruleika-tengsl. Að kalla hann, fremsta hryðjuverkamann heims -- farsakennt.

Iran’s hostilities substantially increased after the foolish Iran nuclear deal was signed in 2013, and they were given $150 billion, not to mention $1.8 billion in cash...Then, Iran went on a terror spree, funded by the money from the deal, and created hell in Yemen, Syria, Lebanon, Afghanistan, and Iraq.

Eitt versta vandamálið við ræður Trumps - er bullið í þeim. Þarna endurtekur hann þráð, sem kennir Íran um allt sem miður hefur farið í Mið-Austurlöndum sl. áratug - sbr. stríðið í Sýrlandi, átök í Afghanistan og Írak. Rugl er of veikt orðalag - allir vita að Írak varð fyrir innrás ISIS 2013, og meira að segja Trump ætti að vita, að íranskir aðilar tóku þátt í aðgerðum í samvinnu við bandarískan her, til að kveða niður Íslamska ríkið. Að sjálfsögðu ber Íran ekki ábyrgð eitt á þeirri átakasyrpu sem spratt af stað í Sýrlandi. Að tengja Íran við átök þ.s. Bandar. voru í árekstri við Talibana -- fær mann til að velta fyrir sér, hvað Trump var að reykja -- þetta er slíkt bull.

They must now break away from the remnants of the Iran deal -– or JCPOA –- and we must all work together toward making a deal with Iran that makes the world a safer and more peaceful place...Peace and stability cannot prevail in the Middle East as long as Iran continues to foment violence, unrest, hatred, and war....Today, I am going to ask NATO to become much more involved in the Middle East process.

Eina ferðina enn, vandamálið við ræður Trumps er bullið í þeim. Trump sem sagt, miðar út frá kenningu sem á engan stað í raunveruleika, þ.s. Íran er erki óvinur alls góðs í Mið-Austurlöndum, bakvið allt slæmt sem gerist og hefur gerst. Kenning sem er fullkomnir órar.".

 

Það er eiginlega sjaldgæfari atlaga að sannleikanum en þessi ræða Trump.

En atlagan að lýðræðinu er samt fólkið sem tekur undir bullið þó það viti betur.

Það er lýgur gegn betri vitund.

Alþekktur siður hjá stuðningsmönnum alræðisstefna, plága sem hrjáði lýðræðislega umræðu til dæmis á dögum Kalda stríðsins þegar kommúnistar litu á orð Stalíns sem heilög orð meitluð á steintöflu.

 

Við upplifum þessar lygar og falsarnir á Íslandi í dag.

Elsti og virtasti fjölmiðill landsins er í þessu fúafeni og virtir sérfræðingar um erlend málefni skrifa greinar í blöðin og vitna í fjarstæðuskrif máli sínu til stuðnings.

Það er sök sér að réttlæta launmorð með því að viðkomandi hafi ekki verið góð manneskja en það er aldrei réttlætanlegt að gera slíkt með beinum lygum, eða vitna í beinar lygar máli sínu til stuðnings.

 

Slíkt er ekki gengisfelling viðkomandi, slíkt er ekki einu sinni atlaga að trúverðugleik viðkomandi.

Heldur endalok hans.

 

Er Trump þess virði??

Kveðja að austan.

Áætluðu árásir á fjögur bandarísk sendiráð

Bandamenn fagna launmorðinu.

 

Sem Morgunblaðið af sinni alkunnri kurteisi kallar víg líkt og þegar kappar drápu hvorn annan á söguöld Íslendingasagnanna.

 

Þessir bandamenn eiga ekkert skylt við bandalagsþjóðirnar sem lögðu skrímsli nasismans að velli, eða þá sem snéru bökum saman við að fella annað skrímsli, og það nýrra, Ríki Íslams, heldur eru bandamenn hinir nýju þeir Donald Trump Bandaríkjaforseti, viðskiptafélagi hans, Múhameð Bin Salman krónprins Sádi Arabíu og miðaldamorðingjarnir sem spruttu út úr Wahhabismanum sem er ríkistrú Sáda.

Fyrir Donald er þetta bisness, og það arðsamur, fyrir Salman er þetta tilbúinn blóraböggull fyrir öll voðaverk Sáda og fyrir Ríki Íslams er þetta kærkomin grið frá aðgerðum Kúrda, Írana og jú Bandaríkjanna sem næstum höfðu gengið frá samtökunum dauðum.

 

Hafi menn einhvern tímann efast um snilld Donald Trumps, þá þarf ekki frekari vitnanna við, hann getur gert utanríkismál öflugasta ríkis heims, að viðskiptatækifæri fyrir sjálfan sig.

Og fer léttara með að sannfæra stuðningsfólk sitt en sjálfur frelsaranum tókst með sína, því Jesú dugði ekki kraftaverkin, heldur þurfti hann krossfestinguna og upprisuna til að lærisveinar hans í raun fóru að taka mark á honum. 

Áður virtist hann hafa verið bara svona skaffari.

 

Hvernig Donald Trump fer að þessu má guð vita.

En hann fer að þessu.

 

Herinn setur sig ekki upp á móti.

Þeir sem græða á átökum eða styrjaldarástandi, standa þétt að baki Trump.

Og fjöldinn vitnar þrátt fyrir að varla er liðin vika síðan Íslamistar voru efstir á blaði yfir óvini hins hvíta kristna miðaldra manns.

 

Trump er síðan húmoristi, hann vill fá friðarverlaun fyrir að æsa til ófriðar.

Sem og að gefa hryðjuverkafólki frið og næði til að safna kröftum og skipuleggja frekari ódæði gagnvart kristnu fólki, hvort sem það erum við hin réttdræpu á Vesturlöndum (opinbert námsefni í skólum Sáda), eða það sem ennþá hefur þraukað í vöggu kristninnar í Miðausturlöndum.

 

Þetta er ekki öllum gefið.

Eiginlega engum.

Kveðja að austan.

Ríki íslams fagnar vígi Soleimani

Styður Morgunblaðið vitfirrta siðblindu??

 

Sem hvarflar að manni eftir leiðarskrif dagsins í dag sem og síðasta Reykjavíkurbréf.  Stuðningurinn vissulega ekki sagður hreint út, en borið blak af vitfirringunni, tekið undir réttlætingu launmorðingjanna sem er ekki einu sinni fals eða fake, heldur hreinræktað bull, og ósvífnin slík að reynt er að tengja glæpinn við annað sem telst vera eðlilegt í hinum siðaða heimi.

Enn og aftur, hver er hin vitfirrta siðblinda launmorðingjanna í Washington??

"No one has right to bring fire to region and especially Iraq for their own interests. We will do all possible not to allow region to be drowned in blood and tears. Turkey does not want Iraq Syria Lebanon or Gulf to be a scene of proxy wars".

Það er að hleypa öllu í bál og brand, breyta púðurtunnu í blóðvöll.

 

Mikið aumari geta skrifin til réttlætingar ekki orðið en var hjá leiðarhöfundi Morgunblaðsins í morgun;

"En fljótlega var rifjað upp að Obama forseti tók á þriðja þúsund slíkar ákvarðanir og þeir sem drónar hans felldu voru iðulega ekki nægilega merkilegir til að þeir væru nafngreindir opinberlega.".

Menn geta rifist um hin skítugu stríð sem einstök ríki heygja við andstæðinga sína, launmorð þeirra á meintum andstæðingum, en það eina sem má segja, að slíkt sé alsiða bæði hjá stórveldum sem og alræðisríkjum.  Stríð við hryðjuverkasamtök sem eru í opinberu stríði við viðkomandi land eru aldrei háð á opnu vígvelli, það þarf tvo til þess.  Ísraelsmenn settu fordæmi í slíkum átökum með því að hefna fyrir hvert tilræði með því að reyna að drepa þá sem ábyrgðina báru.  Og höfðu árangur, næstum daglega fréttir um tilræði við gyðinga víðsvegar um heim, urðu sjaldgæfar.

Obama sem og Bush á undan honum báru ábyrgð á slíku stríði, og allavega er ljóst að þeir náðu að hefta mjög starfsemi Alkaida með þeirri taktík Ísraela að ráðast á forystumenn samtakanna.

Menn geta síðan deilt um réttlæti slíkra aðgerða, en aum er sú þjóð sem ver sig ekki.

 

Á milli þessa og hins, að launmyrða háttsetta fulltrúa erlendra ríkja, er það regindjúp að það fyrra er stríð við aðila án ríkisfangs sem eru í opinberu stríði við viðkomandi land, og það seinna er opinber stríðsyfirlýsing gagnvart sjálfstæðu ríki.

Í heimshluta sem þarf ekki mikið til að allt springi í loft upp, be drowned in blood and tears.

Slíkt er út frá allri heilbrigðri skynsemi vitfirring, og siðblinda að halda að dauðlegir menn hafi þann rétt.

Mannkynssagan þekkir vissulega slíka klikkhausa en siðmenningin hefur alltaf fordæmt hegðun þeirra.

 

Forsenda friðar er að ríki virði vissar leikreglur, og þær hafa verið að þróast síðustu árhundruðin.

Menn lýsa til dæmis yfir stríði áður en menn fara að myrða andstæðingana.

Telji menn sér ögrað, þá svara þeir ögrunum með viðeigandi hætti, hafi þeir þá styrk og getu til þess. 

Og menn launmyrða ekki leiðtoga annarra ríkja uppúr þurru, ekki beint. 

Jafnvel þau mörk  virtu klikkhausarnir Stalín og Hitler.

 

Að bera blak af slíku er fáheyrt.

Fyrir utan heimskuna, að átta sig ekki á hvað er undir, sjálfur heimsfriðurinn, þá fordæmir siðað fólk, sem virðir lýðræðisleg gildi, alltaf slíkt athæfi.

"Sumt gerir maður ekki" sagði góður stjórnmálamaður hér á árum áður, og hitti naglann.

Sumt gerir maður ekki.

Og Snorrabúð er stekkur ef fyrrum ritstjórar Morgunblaðsins hafi ekki kjark til að benda núverandi ritstjórum á.

 

Svaðið er ekki arfleið Morgunblaðsins.

Svaðið á ekki að vera grafarskrift þess.

Kveðja að austan.

 

Við hleyptum öllu í bál og brand.

 

En berum enga ábyrgð á afleiðingunum sagði glaðhlakkalegur Donald Trump, eins og honum væri skemmt eða það hlakkaði í honum.

En mig grunar samt að innan ekki svo langs tíma munu aðstandendur fórnarlambanna höfð mál á hendur launmorðingjunum í Washington.

Ef ekki þá munu miklir fjármunir skipta um hendur undir borðum, því ábyrgðin er augljós, og aðeins gungur orða hana ekki.

 

Minni svo enn og aftur á orð Erdogan, kjarni málsins sem aðeins siðblindir vitfirringar skilja ekki;

"No one has right to bring fire to region and especially Iraq for their own interests. We will do all possible not to allow region to be drowned in blood and tears. Turkey does not want Iraq Syria Lebanon or Gulf to be a scene of proxy wars".".

 

Blóðið er þegar farið að flæða, að því virðist launmorðingjunum til skemmtunar.

Eru svo heimskir í forheimsku sinni að halda að þetta sé enn eitt meinta hryðjuverkið sem þeir geti kennt hinum launmyrta um.

 

Það er greinilega mörg vötn runnin til sjávar frá því að Kennedy forseti sagði Ich bin ein Berliner.

Rammaði þar inn muninn á lýðræðisþjóðum annars vegar og alræðisstjórnum hins vegar.

 

Þá skyldu ritstjórar Morgunblaðsins hvað það þýddi að vera hluti af samfélagi siðaðs fólks sem kenndi sig við lýðræði.

Hvað það varðar hafa líka mörg vötn runnið til sjávar.

 

En munum samt, að blóðið rennur því enginn kallar á ábyrgð.

Enginn kallar á að launmorðingjarnir séu dregnir fyrir dóm.

 

Á meðan flæðir blóðið.

Jafnt hjá saklausum sem og ungum mönnum sem hafa það eitt til saka unnið, að þjóna landinu sínu, hvort sem það er fyrir Íran eða Bandaríkin.

 

Og í alvöru.

Það er ekki Donald Trump að kenna.

Kveðja að austan.

Neitar að tjá sig um ábyrgð Bandaríkjanna

Á bak við gasprið var sáttarhönd.

 

Og heimsbyggðin andar léttar.

En af hverju??

 

Jú Trump ætlar ekki að stigmagna átökin.

En er hægt að loka öskju Pandóru eftir að hún hefur einu sinni verið opnuð??

Er hægt að myrða leiðtoga annarra ríkja, slá um sig með bulli til að réttlæta það, og halda að það sé hægt að komast upp með það??

 

Vonandi, vonandi hafa nógu margir heimsleiðtogar sent Trump þau skilaboð sem Erdogan Tyrkjaforseti orðaði fyrir hönd vitiborins fólks og full ástæða til að hafa eftir;

"No one has right to bring fire to region and especially Iraq for their own interests. We will do all possible not to allow region to be drowned in blood and tears. Turkey does not want Iraq Syria Lebanon or Gulf to be a scene of proxy wars".

Það hefur enginn leyfi til að kveikja stríðselda og drekkja heilum heimshluta í blóði og tárum, enginn, hvort sem það eru alræðisöfl eða þjóðir sem hafa kennt sig við lýðræði og siðaða hegðun.

 

Málið og meinið er að klerkarnir í Íran hafa ekki ennþá hefnt sín.

Ekki einu sinni pappírstígur sendir nokkrar rakettur sem hefnd, þeir hefðu alveg eins getað sent myndband af áramótasprengingum í Reykjavík.

Láti þeir þetta yfir sig ganga, þá standa þeir naktir frammi fyrir þjóð sinni, sitja uppi með hægdrepandi refsiaðgerðir sem grafa undir bæði efnahag landsins sem og völdum þeirra.

Það er því barnaskapur að halda að deilan sé búinn núna.

 

Það er nefnilega þannig með Pandóruöskju, að hana er aðeins hægt að opna.

Íranar eru bara rétt að byrja.

Þeim tókst í fyrstu atrennu að sína heiminum, það er þeim hluta hans sem vissi það ekki, að Trump er sprelligosi, sem fær að tísta á meðan fullorðna fólkið teflir sína ógnarskák.

Næsta atlaga þeirra er ekki fyrirsjáanleg, en hún mun bíta.

 

Og hve lengi láta Bandaríkjamenn bíta sig án þess að svara fyrir sig??

Þar er efinn.

 

Aðeins um tímann.

En ekki um að átökin eigi eftir að stigmagnast.

 

Því miður.

Kveðja að austan.

Sendu hryðjuverkamönnum skilaboð

Hefndin er mín.

 

Segja Íranar og segjast bara vera rétt að byrja.

Að þeirra sögn er hlutfallið núna 80:1 sem aftur varpa boltanum til Bandaríkjamanna skora fleiri stig, það er mannslíf, þegar þeir hefna sín.

 

Eftir standa nakin á berangri fíflin sem héldu því fram, eða trúðu því að leiðin til friðar væri mörkuð launmorðum á leiðtogum meintra óvina sinna.

Og orkuforðabúr heimsins í uppnámi.

 

Það þótti engin blóðhefnd standa undir nafni á Korsíku nema menn dræpu hvorn annan í að minnsta kosti 200 ár, aðeins þá var hugað að því að reyna útrýma eftirlifendum af fjandmannaættinni.

Eins og digurbarkarnir tala þessa dagana er ólíklegt að menn sættist í bráð.

Þeir sem glíma við siðblindu tala digurbarkalega um getu bandaríska hersins að sprengja Íran aftur á steinöld, það er að taka svona óbeina Grétu á þetta en heimsbyggðarinnar allra skulum við vona að siðblindir vitfirringar fari ekki með æðstu völd þar vestra.

Jafnvel Hannibal Lecter myndi ofbjóða þá massívu slátrun á saklausu fólki.

Sem og að illskan mun breiðast út, og saklausir í öðrum löndum munu falla.

 

Í ljósi þessa er ótrúlegt að þjóðir heims skuli ekki sameinast í fordæmingu á klikkhausunum

Mönnunum sem hafa mannslífin svona í flimtingum.

Klikkhausunum sem ógna sjálfum heimsfriðnum.

 

Heimurinn er eins og hann er.

Ekkert sérstaklega fullkominn.

 

En það er samt óþarfi að eyða honum.

Við höfum engan annan uppá að hlaupa.

 

Og við eigum öll líf sem við sórum að vernda.

Kveðja að austan.

 

 

Vígs Soleimani enn óhefnt

Launmorðingi réttlætir sig.

 

Sá launmyrti var víst að undirbúa árásir.

 

Og spurningin er, mun Morgunblaðið taka undir þessa réttlætingu í leiðurum sínum eða næsta Reykjavíkurbréfi??

Sem og munu lögfræðingar morðingja krefjast sýknu, sem og lausnar hjá þegar dæmdum, í krafti þess að sá sem drepinn var, sá sem var myrtur, hafi haft eitthvað illt í hyggju.

 

Í heimi þar sem heimskan er sett í öndvegi þá komast menn bæði upp með svona réttlætingu, sem og að virtir fjölmiðlar birta bullið eins og hverja aðra frásögn.

Frá er sá tími þegar múlbundnir fréttaþulir í fjölmiðlum alræðisstjórna þurftu að lesa upp fjarstæður og rugl, í dag er máttur peninga slíkur að fríviljugir gera slíkt hið sama.

Morðingjarnir, bandamenn hryðjuverkamanna sem sannarlega slátra saklausum á hverjum degi, útrýma kristni úr vöggu sinni, þeir kaupa bara umfjöllun, eiga fjölmiðla, stjórna umræðunni.

Gera Írani ábyrga fyrir glæpi sína.

 

Það væri öllum hollt að horfa á heimildarmynd BBC um morðingjann í Ryadh, glæpi hans og miðaldaofstæki. 

Meðal afreka hans er bein fjármögnun á hryðjuverkum á Vesturlöndum, dráp, pyntingar og aftökur á sjíta minnihlutanum í Sádi Arabíu, og núna nýlega sáum við mynd af ungri stúlku, afmyndaða eftir pyntingar, hennar glæpur var að keyra bíl.

Kennsluefni í skólum hans er að kristna eigi að drepa.  Og sannarlega er það gert með fjármagni frá Ryadh.

 

Hinn launmyrti sjíti vann gegn voðaverkum krónprins Sáda.

Studdi trúbræður sína í Sádi Arabíu, vopnaði kúgaðan minnihluta í Yemen.

Og barðist við Íslamista í Sýrlandi, flesta þekkta undir nafni Ríkis Islams.

Sem og hann var andstæðingur bandamanna Sáda, Bandaríkjamanna.

 

Þeir myrtu hann og réttlæta morðið með gróusögum, ýkjusögum.

Eiga eiginlega aðeins eftir að kenna honum um að hafa falið gjöreyðingarvopnin sem fundust ekki Írak.

En þeir kenna honum um hryðjuverk Íslamaista, kenna honum um að fjármagna það sem Sádar hafa gert í áratugi.

Að fjármagna hatur, öfga og miðaldaofstæki.

 

Trúgjarnir sjá glæpi Sáda.

Og kenna Írönum um.

Þannig er heimurinn í dag.

 

Alræðisstjórnir eru fallnar.

En vinnubrögð þeirra lifa.

 

Þær töpuðu stríðinu við lýðræðið.

En unnu friðinn.

 

Það er, þau keyptu hann.

Kveðja að austan.

 

 

Soleimani var að undirbúa árásir

Launmorð æsir upp múginn.

 

Eins og það sé eitthvað nýtt.

Þekkt er afleiðingin af launmorðinu í Belgrad 1914, áður en mánuður var liðinn, þá fylltust helstu borgir Frakklands, Austurríkis, og Þýskalands af fólki sem vildi fara í stríð.

Þó vissu fæstir hvar Belgrad var, hvað þá að fólk vissi um þennan Ferdinand sem myrtur var.

Eina spurningin er hvort launmorðinginn hafi gert sér grein fyrir afleiðingum launmorðs síns.

 

Í dag er slíkt ekki spurning, það er ekki til betri leið til að sameina þjóð en að myrða leiðtoga hennar úr launsátri.

Þetta vissu þeir sem ábyrgðina báru í Pentagon, þó enginn dragi það í efa að Trump hafi ekki haft hugmynd um afleiðingar eða á nokkurn þann hátt að þekkja til sögunnar. 

Skrifast ekki á Trump heldur almenna menntun í Bandaríkjunum.

 

Í þerri merkingunni er Trump ekki heimskur.

Alvarlegar efasemdir vakna hins vegar um gáfnafar stuðningsfólks hans í Evrópu, þar er heimurinn stærri en suður hluti heimsálfunnar sem kennd er við Norður Ameríku, og sögukennsla eftir því.

 

Ég hef áður vitnað í Björn Bjarnason sem ég hélt að væri fróður maður, og mig langar að halda á lífi einni af heimskunni sem hann tók undir þegar hann vitnaði í áróðursmann Sáda, starfandi á NYT.  " Eftir að hafa búið um sig í Sýrlandi í skjóli Bashars al-Assads forseta og aðstoðað hann við að drepa 500.000 Sýrlendinga".+

Það er áætlað að mannfallið í borgarstyrjöldinni í Sýrlandi sé innan við 500.000 manns, margir drepnir í átökum en ekki síður í drápum sigurvegara á andstæðingum sínum.  Á þeim tíma sem stjórnin í Damaskus réði yfir fáum svæðum en kringum höfuðborgina, þá bitnuðu slík dráp á embættismönnum hennar og fórnarlömbin tali í tugþúsundum. Síðan má ekki gleyma öllum drápum Islamista, kennda við Ríki Íslams, sem stóðu fyrir trúarhreinsunum, myrtu kristna, sjita og aðra trúarhópa umvörpun.

 

Íranar komu þessu fólki til varnar, gegn vilja Sádar og Tyrkja, bandamanna vestrænna ríkja.

Að kenna þeim síðan um öll drápin, er ekki heimska, heldur vanvirðing gagnvart öllum fórnarlömbum trúar og þjóðernisofstækis sem sagan kann svo ríkulega mörg dæmi um.

 

Eins og engin séu mörkin að réttlæta Trump.

 

Það eru öfug áhrif launmorðsins.

Forheimskan og í raun hið þegjandi samþykki með hryðjuverkum Islamista og ógnarverkum þeirra.

 

Slík er arfleið Sigurðar frá Vigri í dag.

Kveðja að austan.

Tugir tróðust til bana við jarðarför Soleimani

Fólkið sem hélt.

 

Að launmorð væri leiðin til að brjóta á bak aftur ógnarstjórn miðaldahyskisins í Teheran, hefur rekið sig á að í stað þess að brjóta á bak aftur, þá tókst þeim að sameina þjóð að baki hyski.

Ekki svo sem nýtt í heimssögunni, Rússar í Leníngrad sögðust berjast fyrir borg sína en ekki kommúnista.

 

Nær hefði verið að senda vopn til landsins, eða dollaraseðla.

Ekki píslarvott.

 

Vandinn er sá að fólkið sem drap úr launsátri, það vissi betur, þó það hvísli svona rugli í eyrun á Trump.

Það er bissness í stríði, og ofboðslega margir græddu stórfé á að plata Bush til að fyrirskipa árás á Írak með því markmiði að koma Saddam frá völdum.

Sem og völd, stríðsæsingarmenn ná oft tangarhaldi á þjóðum sínum.

 

Eftir standa þeir sem trúa, eða bulla.

Bulla frá sér allt vit.

 

Dæmi um það eru skrif Björns Bjarnasonar þar sem hann vitnar í dálkahöfund New York Times, og leitun er að öðru eins rugli og þar kemur fram.

Það er eins og að Íran sé upphaf og endir alls sem hefur gerst í Miðausturlöndum síðustu áratugi, og allt skrifast á reikning hins launmyrta.

Staksteinar falla líka í þessa gryfju í dag, telja launmorðið dáð því sá myrti hafi verið hryðjuverkamaður.

 

Þegar ferill hans er skoðaður í góðri grein á Mbl.is þá er minnst á árás á bænahús gyðinga í Argentínu á tíunda áratug síðustu aldar, og svo???

Benin forsætisráðherra Ísraels fékk friðarverðlaun Nóbels, þó hann hefði á yngri árum fyrirskipað dráp á hundruðum Araba á meðan stríðið um tilveru Ísraels stóð yfir.  Hann breyttist og kom síðan á sögulegum friði við Egypta.

Eins virðist það vera með þann launmyrta, hann tók höndum saman við Bandaríkin í baráttunni við Islamista, og hafði árangur sem erfiði.

 

Þegar við heyrum um sprengjur í moskum sem drepa tugir eða hundruð, eða sprengjur á útimörkuðum eða við helga pílagrímsstaði, þá eru það Islamistar að slátra saklausum sjítum.

Þegar við heyrum um árásir á kirkjur eða aðra staði þar sem kristnu fólki er slátrað, þá eru það Islamistar.

Islamistar eru súnnítar, öfgamenn þeirra trúarbragða sem álíta bæði kristna og sjíta réttdræpa.

 

Þeir eru hryðjuverkamenn dagsins í dag, og þeir eru ekki fjármagnaðir af Íran.

Þeir eru fjármagnaðir af Sádum, helstu bandamönnum vestrænna ríkja í Miðausturlöndum.

 

Bullararnir eða hvað sem við eigum að kalla þetta fólk, virðast ekki gera greinarmun á raunverulegum hryðjuverkum Islamista eða ímynduðum sem Írönum er kennt um.

Þeir lepja upp áróðurinn eins og heilasellurnar séu dauðar, eða ekki til staðar.

Réttlæta þannig morð, launmorð.

 

Í hvers þágu??

Allavega ekki fórnarlamba Islamsita.

Hvað þá siðmenningarinnar sem Islamistar ógna með miðaldaöfgum og hatri sínu.

 

Hverra þá??

Kveðja að austan.

Flykkjast út á götur út til að minnast Soleimanis

Ætlar Trump að hersetja Írak?

 

Það er eins og manngreyinu sé ekki sjálfrátt um hvernig siðaðar þjóðir haga sér.

Þekkir ekki muninn á hegðun lýðræðisþjóða og alræðisríkja.

Eiginlega hefur heimsbyggðin ekki hlustað á svona tal frá því að lítill maður með hlægilegt yfirvaraskegg hrópaði hótanir á múgæsingarfundum.

 

Þetta fer eiginlega að vera galið, en ennþá galnara er að vera vitni að meðvirkni þeirra sem hlusta á svona tal og sjá ekki fáránleikann við það.

Eða kóa með vitleysunni og bulla út í eitt.

 

I kvöldfréttum Stöðvar 2 spurði Sindri fréttamaður utanríkisráðherra hvort launmorðið á herforingja sjálfstæðs ríkis sem Bandaríkjamenn eiga ekki í stríði við og var myrtur í öðru landi sem á að heita bandalagsþjóð Bandaríkjanna, hafi ekki verið skiljanlegt vegna þess að viðkomandi fórnarlamb hafði skipulagt tvær aðfarir að bandarískum sendiráðum, í annarri hefði sendiherra látist.

Sindri er þá að vísa í morðin í Benghazi þegar Islamistar í Líbýu hertóku bandaríska sendiráðið og drápu sendiherrann og annan háttsettan stjórnarerindreka.  Það eru engin tengsl milli Islamista og Íran, þeir fyrri eru öfgasúnnar þar sem allar rætur fjármögnunar og stuðnings liggja til Sádi Arabíu, ekki Írans, enda er kennt í skólum Sáda að sjitar séu jafn réttdræpir og kristnir.

Svona er logið til og síðan tekið undir að viðkomandi herforingi hafi skipulagt aðförin að bandaríska sendiráðinu í Bagdad, en hvaða sannanir liggja þar að baki aðrar en fullyrðingar morðingja hans?? 

 

Bandaríkjamenn misstu trúverðugleika sinn þegar þeir lugu til um ástæður þegar þeir réðust á Írak og reyndu að sprengja landið aftur á steinöld.  Það voru ekki gjöreyðingarvopn í Írak, og Saddam Hussein fjármagnaði ekki Islamista, það voru Sádar og svo Katar af einhverju leiti.

Þegar þeir fullyrða að Íranar fjármagni hryðjuverk, þá geta þeir ekki nefnt dæmi þar um.  Þeir sívitna í ógnar og hryðjuverk Islamista sem eru súnnar eins og áður sagði, og vagga öfga þeirra er ofsatrú sem vill svo til er ríkistrúin í Sádi Arabíu.  Allar moskurnar, þar á meðal sú sem á að rísa hér í Reykjavík, sem boða hatursboðskapinn gegn fólki af öðrum trúarbrögðum, gegn vestrænni menningu og vestrænu fólki, eru fjármagnaðar af Sádum.

Og Sádar eru helstu bandamenn Bandaríkjanna í Miðausturlöndum, og svo er illvirkjum þeirra logið uppá Írana.

 

Hvernig getur fullorðið fólk tekið þátt í svona lygaþvættingi, fengu menn ekki nóg af lygum og blekkingum kommúnismans að ekki sé minnst á mannsins með skeggið??

Það er ákaflega líklegt að Íranar séu að auka á þrýstinn á Bandaríkjamenn í Írak, enda þeim auðvelt verk, það voru Bandaríkjamenn sem komu sjítum til valda í landinu og þurfa núna að bíta úr því að þegar þeir koma einræðisherra frá, einræðisherra sem kúgaði meirihluta þjóðarinnar, að þá nýtir meirihluti þjóðarinnar sér þann lýðræðislega rétt sinn að velja sér þann bandamann sem hún kýs.

Og geti þjóðir ekki tryggt öryggi erlendra sendiráðsmanna, þá yfirgefa viðkomandi sendiráðsmenn landið og samskipti þjóðanna verður eftir því.

 

Það er ekkert sem gefur taparanum rétt á að myrða og drepa í hefndarskyni, að hóta viðkomandi þjóð eld og brennisteini.

Það er ákaflega eðlilegt að sjálfstæð þjóð krefjist þess að erlendir morðingjar yfirgefi landið eða hverjir myndu sætta sig við svona framkomu??

Við Íslendingar??

Nei, aðeins leppar myndu gera það.

 

Bandaríkjamönnum varð mikið á.

Heimurinn fer fljótt á hliðina ef fleiri þjóðir taka upp svona samskiptareglur.

Það er ótrúlegt að upplifa að alræðisríki eins og Kína geti sett niður við forystuþjóð vestrænna lýðræðisríkja.

Má segja að nú sé Snorrabúð stekkur hvað það varðar.

 

Við höfum áður upplifað að menningarþjóð, kjarnaríki í Evrópu, fór út af striki siðmenningarinnar og fór að láta dólgslega við nágrannaríki sín.

Þá eins og núna voru margir sem sáu ekkert athugavert við dólgslætin, fundu ýmislegt til réttlætingar, eins og til dæmis að aðrar alræðisstefnur hegðuðu sér með svipuðum hætti.

Eins og að hægt sé að réttlæta slæmt með því að benda á annað slæmt.

Eins og það sé hægt að réttlæta hryðjuverk og launmorð með því að benda á aðra hryðjuverkamenn.

Eins og það sé hægt að réttlæta yfirgang og kúgun stórra ríkja gagnvart öðrum minni með vísan í að einræðisríki hefðu örugglega gert það sama.

 

Það gengur ekki því þá verða allir eins.

BAD.

Kveðja að austan.

Trump hótar Írökum