Þjóðinni er ætlað að blæða - af­l­andskrónu­eig­end­um að græða

 

Í guðanna bænum, þið sem eigið börn og barnabörn, þið sem ætlið að eiga heima áfram í þessu landi forfeðra okkar.

Lesið þessa frétt, lesið feisbókarfærslu Lilju, og reynið að skilja rök hennar og þær forsendur sem leiða til orða hennar sem ég gerði að fyrirsögn þessa örpistils.

 

Sumt á maður ekki að þykjast vita betur.

Sum á maður aðeins að skilja.

 

Allavega ef maður á  líf sem þarf að verja.

Kveðja að austan.

„Sumir eru jafnari en aðrir“

Miðaldamenn ógna samfélögum fólks.

 

Á Íslandi hola þeir innviði samfélagsins svo þeir eru langt komnir með að umbreyta velferðarþjóðfélaginu í postulínsþjóðfélag frjálshyggjunnar.

Í hinum forna heimi Mið-Austur og Austurlanda eyðileggja þeir menningarverðmæti og sprengja fólk og fénað í tætlur.

Á Bandaríkjaþingi mæta þeir með snjóbolta og biblíur og berjast gegn vísindum.

 

"Afturhvarf mörg ár aftur í tímann" er aðeins byrjun á ferli sem endar á afturhvarfi um margar aldir.

Ef ekkert er að gert.

Ef enginn snýst til varnar.

Kveðja að austan.

„Afturhvarf mörg ár aftur í tímann“

Prentað í þágu hinna ofurríku.

 

Til að magna upp sýndarverð sýndarpappíra.

Molarnir eiga síðan að falla útí hagkerfið og koma hinu raunverulega hagkerfi til góða.

 

Á meðan skortir fé í alla innviði, vestræn þjóðfélag éta upp samfélagsfjárfestingu fyrri kynslóða.

Á meðan býr 20 til 30% fólks við sára fátækt, og er háð matargjöfum hjálparsamtaka.

 

Hin gjörspillta yfirstétt eyðir stórfé í að sannfæra lýðinn um að alltí sé í lagi.

En það er ekkert alltí lagi, postulínsþjóðfélag frjálshyggjunnar riðar til falls.

Og fellur saman innanfrá undan sínum eigin þunga almenningur spyrnir ekki við fótum og kemur af sér sníkjudýrum fjármagnsins.

Þeirra sem ekkert skapa, aðeins sjúga.

 

Reyndar væri Evrópa löngu fallin ef hún ætti sér einhvern óvin, því innra öryggi var það fyrsta sem var postulínshúðað af stjórnmálamönnum frjálshyggjunnar.

Ef ekki væri til kjarnorkuvopn, og Pútín dytti í hug að skreppa í helgarferð til Parísar, með nokkrum skriðdrekum, þá gæti hann það, en hugsanlega þyrfti hann að taka langt helgarfrí, kæmi ekki til Parísar fyrr en á þriðjudegi, ekki vegna sýndarvarna Vestrænna ríkja, heldur sökum fjarlægðar frá rússnesku landamærunum.

Veldi sem áður voru, eru ekki neitt, ekki einu sinni pappírstígrisdýr.

 

Á meðan er prentað og prentað.

Eins og enginn sé gærdagurinn, með sinni reynslu, með sinni sögu, með sínu Hruni.

Og á morgun eða hinn, það er þegar einhver bendir á að engin verðmæti eru að baki hinu háa hlutabréfaverði, þá hrynur allt sýndarhagkerfið, og almenningur verður aftur skuldsettur fyrir þeim kostnaði sem fellur á raunhagkerfið.

 

Nema, nema, hann segi hingað og ekki lengra.

Hugsanlegar, en ekki líklegt.

 

Auðurinn mun sjá til þess.

Kveðja að austan.

Prentvélar ræstar við fögnuð fjárfesta

Morgunblaðið á allan heiður.

 

Fyrir vandaða umfjöllun um loftlagsvána og fréttaflutning af málþinginu Heit framtíð, kalt stríð.

Minnir á þá gömlu góðu daga þegar ritstjórn blaðsins taldi það hlutverk sitt, fyrir utan að vera í bullandi pólitík, að fræða og upplýsa, bæði með ítarlegum fréttaskýringum sem og almennri umfjöllun um hin ólíklegustu málefni og fyrirbrigði.

Blaðamenn Morgunblaðsins eiga mikla þökk skilið, sem og ritstjórnin sem stýrir þessum fréttaflutningi, það er ekkert sjálfgefið að hægrisinnað blað segir sannleikann í málum þar sem hagsmunir auðs og fjármagns fara gegn þeim sannleika.

 

Ég ætla ekki fjalla efnislega um loftslagsbreytingar, skora aðeins á þá sem nefið reka í þennan pistil, að kynna sér þessa frétt sem ég tengi við, sem og aðrar þær fréttir sem vísað er á í tengslum við hana.

Það er þannig að þetta kemur okkur öllum við og við sem eigum líf sem þarf að vernda, getum ekki uppfyllt þá skyldu ef látum sem svo að þetta séu mál sem okkur komi ekki við.

Það eru börnin okkar og barnabörn sem munu upplifa Harmageddon ef  allt fer á versta veg.

 

Nei, hér er að sjálfsögðu fjallað um frjálshyggjuvána, sem ein og sér er það alvarleg að loftlagsváin er aðeins daufar gárur í kaffibolla miðað við þá svörtu skepnu.

"Markaðstrúin er rót afneitunar" er yfirskrift þessarar fréttar og er þá vísað í Gavin Schmidt, forstöðumann Goddard geimrannsóknastofnunar NASA.

 

Þeir sem aðhyll­ist frjáls­hyggju hafi ekki getað sætt sig við þá staðreynd að markaður­inn hafi ekki sjálf­ur getað séð um að bæta upp nei­kvæð ytri áhrif los­un­ar gróður­húsaloft­teg­unda. „Það hef­ur alltaf verið þessi hóp­ur í Banda­ríkj­un­um sem hef­ur verið svo upp­full­ur af kenni­setn­ing­um hins frjálsa markaðar að hann hef­ur aldrei getað horfst í augu við að um­hverf­is­vanda­mál séu vís­bend­ing um markaðsbrest og að markaður­inn sjái ekki um hlut­ina sjálf­ur á frá­bær­an hátt.

 

Í þessi orð ætla ég að hnýta því mér finnst full mikli virðing sýnd þessum afglöpum sem ógna tilvist mannsins að láta þá komast upp með einhvera hugmyndafræðilega afsökun.

Þessir menn vita nákvæmlega allt um þá ógn sem blasir við, því bæði er þekking nauðsynleg forsenda trúverðugs fávitaháttar sem og árangursríkra blekkinga byggða á hálfsannleik og rangfærslna á staðreyndum.

Þeir þiggja hins vegar fé fyrir afstöðu sína og málflutning.  Þeir eru málaliðar í þjónustu kolefnaiðnaðarins.

Taka aurinn fram yfir líf, svo einfalt er það.

 

Það er nefnilega mikill misskilningur að þeir sem knýja áfram hægriöfga séu einhverjir prinsippmenn eða eigi einhverja lífsskoðun aðra en veskið í rassvasa sínum.

Það er ekki svo, þeir þjóna. 

Þjóna hinum ofurauðugu.

Ekkert annað.

 

Ef Exxon á sínum tíma tekið ákvörðun um að framtíð fyrirtækisins lægi í grænni orku, þá væru frjálshyggjumenn, allir sem einn miklir umhverfisverndarmenn.

Hugveitur þeirra og málgögn væru uppfull af fréttum um ávinninginn, um gróðann, um tækifærin sem fælust í orku og orkugjöfum sem væru sjálfbærir og ógnuðu ekki tilvist mannsins.

Og hægrimenn dönsuðu með.

 

Svo lítið skilur milli feigs og ófeigs.

En Ófeigur fékk að ráða.

Kveðja að austan.

Markaðstrúin rót afneitunar

Hinn göfuglyndi stingur aftur.

 

Svona ef ske kynni að fyrri rýtingsstunga hafi ekki haft tilætluð áhrif.

Sem sannar að Bjarni er læs, á bókmenntir, sem reyndar er ákaflega sjaldgæft með hans líka úr geira frjálshyggjunnar, en Furstann hefur hann greinilega lesið.

Áður var vitað að hann þekkir til grískra sagna, um harðstjórann sem veitti öðrum harðstjóra lexíu um hvernig hann ætti að halda völdum. Trixið var einfalt, kennslan fólst í göngutúr út á akur með sigð í hendi, og þar var allt kornaxið sem stóð uppúr, afhausað, eða réttara sagt, kúttað niður í sömu hæð og restin.  Fræði sem komu skýrt fram í skipun Ólafar Nordal í embætti innanríkisráðherra

Í Furstanum er tekið skýrt fram að orð móta ásýnd, ekki gjörðir, og dæmi tekin úr sögu Borgarættarinnar ítölsku.

 

Þess vegna kemur mærðin fyrst og síðan saltið í sárin, að traust skipti höfuðmáli, og því miður hafi Hanna Birna fyrirgert því trausti.

Kallast svona nett jákvæður stuðningur.  

Í anda Borgara.

 

Hjörðin tekur undir, því það er í eðli hjarðar að fylgja, láta blekkjast, ekki spyrja spurninga, eins og um má lesa í Furstanum.

Spurninga sem Hanna Birna benti réttilega á, "af hverju ætti hún að fórna sinni pólitískri stöðu vegna málefnis einhvers "ómerkilegs" hælisleitanda"?

Eða hvernig stóð á því að fyrrverandi lögreglustjóri í Reykjavík var kominn með nýtt starf í Samfylkingarkerfi Reykjavíkur áður en hann sagði af sér af meintum prinsipp ástæðum?

Spurninga sem blasa við en eru ekki spurðar.

En má lesa um í Furstanum.

 

"Sett uppið" sem felldi Hönnu Birnu er svo augljóst, vitað var að hún myndi trúa sínu nánasta samstarfsfólki, og hún myndi verja það.

Ljónynjan myndi reyna fá skýringu á því sem hún skildi ekki, hún myndi á einhvern hátt ráðríkjast gegn embættismanninum sem með rannsóknina hafði að gera.

Og þá þurfti aðeins að tryggja, að annar embættismaður, sem reyndar er þekktur fyrir að halda kjafti, þagði til dæmis þegar þingmaður hótaði skattrannsóknarstjóra fangelsisvist ef hann kæmi upp um skattsvikara sem fóðra flokkinn, myndi hefja "algjörlega sjálfstæða rannsókn".

Sem gekk eftir og eftirmálin eru þekkt.

 

Enginn spyr af hverju aðstoðarmaðurinn sveik og blekkti Hönnu, enginn spyr af hverju allt gekk svo smúthh  þegar gröf hennar var grafin.

Hvað fékk hann fyrir, hver var hans umbun?

 

Og út frá tölfræðilegum líkindum, þá er næstum því útilokað að fleiri séu læsir í forystusveit Sjálfstæðisflokknum, það er þegar sannarlega fannst einn, svo mjög er ólíklegt að Hanna Birna viti að hver gróf hennar gröf, og hrinti henni ofaní þar að auki.

Hvað þá að hún skilji hvað býr að baki hinu meintu göfuglyndi formannsins í hennar garð sem lesa má um í viðtalinu í Frjálsri verslun.

Vöndinn skal kyssa, og skóna skal sleikja.

Slíkt gæti tryggt fyrirgefningu og endurkomu.

 

Auk þess ávinnings að vera ekki axið sem höggvið er næst. Samanber að sá sem knékrýpur er ekki í áhættuhóp að vera höggvinn, eða í nútímanum, niðurlægður og smækkaður eins og henti þingflokk Sjálfstæðisflokksins.

Valdið er Bjarna, og göfuglyndi hans einnig.

 

Og sem aðdáandi Furstans, skrifa ég ekki þennan pistil til að gráta Hönnu, hún hjálpaði svo sem til við gröft sinn, heldur til að vekja athygli á hve klassísk rit þessi bók Machiavellis er, og tímalaus að auki.

Ásamt því að vekja athygli á því að ennþá eru lesnar bækur þó frjálshyggjan sem slík telur það algjöran óþarfa, enda lestur hvorki hagkvæmur eða líklegur til að auka tekjumöguleika fólks.

Að samt sem áður lesi formaðurinn, og nýti sér þann lestur sér til framdráttar.

 

Bókin lifir og á það skal bent.

Bækur fást á bókasöfnum, í bókabúðum, á bókamarkaði, eða heima hjá afa og ömmu.

Hún lifir í lestri okkar, og hún lifir í lifandi dæmum eins og þessi pistill fjallar um.

Dæmisögur, þekking, viska.

 

Hanna var hvort sem er óttalegur vargur, kvenmaður að auki.

Þess vegna gott viðfangsefni í þá dæmisögu sem lýst var hér að ofan.

Þegar skáldsagan varð raunveruleiki, og raunveruleikinn lygilegri en skáldsagan.

 

Og er því ekki trúað.

Eins og Borgia benti réttilega á, einn siðlausasti páfi Rómarkirkju, en vinsæll og vel liðinn meðal alþýðu manna.

 

Vissi sínu viti.

Og er ekki einn um það.

Kveðja að austan.

 

 

 

 

Gerir ráð fyrir endurkomu Hönnu Birnu

Loksins, loksins ratar satt orð af munni.

 

Formanns Félags Múslima á Íslandi.

Það er rangt að kalla þá fasista sem eru ekki fasistar.

Saudar er ekki frekar fasistar en Ivar grimmi, Genghis Kahn, eða Lúðvík 14, svo ég nefni til nokkra stjórnsama samtímamenn þeirra.

 

Fasismi er stjórnmálastefna sem þróaðist á 20. öldinni, út frá ákveðnum straumum í pólitískri gerjun 19. aldar.

Þess  vegna geta miðaldamenn aldrei verið fasistar, þó ákveðin líkindi megi finna með stjórnarháttum þeirra og þess sem einkennir fasismann.

Quinn keisari var ekki kommúnisti, þó alræði hans og ofríki væru mjög í anda Stalíns, enda þó nokkuð margar aldir á milli, og Quinn kom á undan.  Frekar má segja að Stalín hafi verið Quin-isti, og ef menn vilja halda áfram með svona samanburð milli ólíkra tímaskeiða, þá má segja að fasistar hafi verið Islamistar, sökum stjórnarhátta þeirra og ofríkis.

En marklaus samanburður, líkindi eru ekki það sama og að vera eins, við erum ekki fílar þó við séum með fjórar fætur.

 

Prik fyrir formanninn að leiðrétta Salman, en óþarfi í framhaldinu að skítyrðast út í hann, þó hann hafi vogað sér að benda á hið augljósa.

Að enginn siðaður maður kemur nálægt Saudum, eða þiggur af þeim fé.

Það gera menn samseka kúgun og algjörum viðbjóði.

Samsekt sem formaður Félags múslima á Íslandi er svag fyrir.

 

Annað prik fær formaðurinn fyrir að leiðrétta lygar sínar frá því í gær, þegar hann kom ofan af hærri fjöllum en Steingrímur þegar hann afneitaði eftirlaunafrumvarpinu sem hann samdi með Davíð Oddssyni, hann játar núna að þreifingar hafi átt sér stað. 

Að gjöf Sauda hafi ekki komið eins og þruman úr heiðskíru lofti, beðið hafi verið um peninga, og meira að segja búið að fá samþykki fyrir þá innspýtingu í íslenskt efnahagslíf.

Sem aftur vekur upp spurningu, hví í fjandanum kannaðist hann ekki við það í gær.

 

En batnandi manni er best að lifa.

Vonandi verður framhald þar á.

Kveðja að austan.

 

Rangt að kalla menn fasista

Jæja, nú eru Saudarnir alltí einu orðnir ljótu kallarnir.

 

Svo sem löngu tímabært að einhver innvígður kveði upp um það.

Þó það væri ekki nema vegna þess að miðaldamenn eru tímaskekkja í nútíma.

Næsta rökrétta skrefið er að krefjast þess að vestrænum moskum sem reistar hafa verið fyrir Saudískt fjármagn, verði lokað, og kennimenn þeirra séu sendir heim til sín.

 

Það er nefnilega mikill misskilningur að þó tímatal múslima gefi upp einhverja miðaldadagsetningu, að þá sé Islam miðaldatrú og Íslamistar hafi rétt á að endurreisa hinu fornu miðaldir í vestrænum samfélögum.

Islam hefur þróast eins og kristin trú og aðlagast nútímanum ákaflega vel, kannski mega reyndar síðustu tvö orðin vera innan gæsalappa.

Islam glímir hins vegar við öfgastefnur, alveg eins og kristin trú, og líkt og auðmenn fjármagna trúarofstækismenn í Bandaríkjunum, þá fjármagna Saudar öfga innan Islams, og þar sem Saudarnir eru þeir einu sem fjármagna útþenslu Islams, þá er ásýnd hennar öfgafull, forneskjuleg, og í andstöðu við alla nútímahugsun.

 

Og alveg tímabært að horfast í augu við það, og alveg tímabært að orða þau sannindi sem Salmann Tamimi á heiður skilið fyrir að orða.

Nema Saudi Arabia er ekki fasistaríki, því fasisminn er afsprengi nútímans, en Saudar hafa aldrei komist svo langt.  Hjá þeim er nefnilega árið 1436, ekki samkvæmt tímatali múslima heldur eftir gregoríanska tímatalinu.  Þeir hafa ekki þróast í 600 ár.

Vona samt að Salmann fái ekki kárínur fyrir, en ef svo er, þá er hugsanlegt hvort ekki mætti samnýta gæsluna með öðrum Salman, og spara þannig pening skattborgaranna.

 

En þetta var ekki tilefni þessa pistils, þó puttarnir hafi tekið völdin og vilja þakka það sem þakkarvert er hjá hugrökkum manni að slá á höndina sem fæðir, mættu fleiri taka upp þá iðju.

Heldur var ástæðan gárungaskapur því fyrsta hugsun mín var þegar ég las þessi orð, var hvenær verður það sagt um ríki Hamas á Gasasvæðinu.

Miðaldamenn, fjármagnaðir af Saudum, engu skárri en rótin sem nærir þá.

 

Hvenær verður sagt satt um þá líka??

Kallar ekki einn sannleikur á annan?

Kveðja að austan.

Þiggja ekki gjafir „fasistaríkis“

Að leika bjána svo vel sé er ekki öllum gefið.

 

Og sú gjöf hefur ekki verið gefin formanni Félags múslima á Íslandi.

Þekkir greinilega ekki til sagnarinnar um grænu baunirnar, sem er grundvallarsögn sem allir sem stunda bjánafræði þurfa að kunna skil á.

 

Hugsanleg skýring á vankunnáttu formannsins eru þeir silkihanskar sem ESB-fylkingin á Rúv notar þegar formaðurinn afhjúpar þekkingu sína í fréttaviðtölum stofnunarinnar.

"Liðsmenn Ríki Íslams eru að uppstöðu úr röðum fyrrum fylgismanna Saddam Husseins", sem er mjög athyglisverður fróðleikur í ljósi þess að Íslamistar voru aflífaðir hvar sem náðist til þeirra innan landamæra Íraks, og "örfáir geðsjúklingar standa að baki hryðjuverkum gegn almennum borgurum", sem hljóta þá að vera í bullandi yfirvinnu þar sem títuprjónarnir sem tákna hryðjuverk Íslamista þekja heilu landsvæðin á landakortum svo vart má sjá aðrar upplýsingar sem þar koma fram.

Rúv útvarpaði bullinu athugasemdarlaust, í stað þess að kveikja rauð aðvörunarljós hjá formanninum að hann gæti ekki sagt hvað sem er, án þess að rökleysa hans yrði afhjúpuð.

 

Núna er formaðurinn meint hissa, lætur eins og hann þekki ekki til að Saudar og Katar fjármagni útþenslu öfgatrúar sinnar í vestrænum löndum, sem og annars staðar þar sem Íslamsistar hafa skotið rótum.

Viti ekki að fyrst kemur fjármagn frá öfgum, svo kemur moskva, síðan koma öfgar, og lokastigið er stór hópur ungs fólks sem er tilbúið að myrða samborgara sína í nafni trúar sinnar.

Og það sem meira er, það er ekki um aðra utankomandi fjármögnun að ræða.

 

Yfirklórið er síðan algjört þegar formaðurinn játar að hafa rætt við Saudana, en skilji svo ekkert í að þeir hafi skilið það sem hann sagði, að örfáar hræður sem eiga ekki bót fyrir boruna á sér, hafi enga burði til að reisa byggingu sem sæmir trú þeirra.

Fátæklingar reistu ekki dómkirkjur Evrópu eða musteri Hindúa.

Og þeir reisa ekki mosku í Reykjavík, nema til komi utanaðkomandi fjármögnun.

Þegar niðurstaða samtalsins, árangurinn sjálfur, liggur fyrir, þá kannast formaðurinn ekki við eitt eða neitt.  Er steinhissa, og hefur vart haft tíma til að úthugsa upp skilyrðin svo hann náðarsamlega geti veitt hinum meintu óumbeðnu peningum viðtöku.

 

Og trúi því hver sem trúa vill.

Sumar lygar eru best ósagðar.

Kveðja að austan.

 

 

 

 

 

Vissi ekki af fjármagninu

Hver refsar fátæku burðardýri??

 

Annar en sá sem nýtur ávinnings af ofurgróða eiturlyfjaviðskipta.

 

Fáviska og forheimska er sjaldnast genetísk, má oftast rekja til fjárhaglegs ávinnings.

Þess vegna eru frjálshyggjumenn eins og þeir eru.

Þess vegna eru burðardýr dæmd á meðan rótin er látin í friði.

 

Vammlausir eru örugglega þeir sem dæma, en þeim er treyst fyrir að snerta ekki fjárflæðið sem fóðrar lögfræðingastéttina ásamt öðrum þeim sem eiga velmegun sína undir að skipulögð glæpastarfsemi njóti friðar og öryggis, hvort sem það eru eiturlyfjahringir, vogunarsjóðir, vændissalar, eða almennir fjárglæpamenn sem hirða gróðann af sýndarviðskiptum sínum en skilja skuldir sínar eftir á gjaldþrota kennitölum.

Og meðvirkir eru þeir sem skrifa og birta svona frétt án þess að spyrja af hverju er vatnsbunan dæmd en ekki þeir sem skrúfuðu frá krananum?  Hvað þá þeir sem höfðu hag af því að skrúfað væri frá vatninu sem eyðilagði innbú og önnur verðmæti.

 

Það er sorglegt að lesa svona frétt, að hið skítuga fjármagn sé ósnertanlegt. 

Ef það aðeins passar sig á að fæða þá sem einu sem voru fengnir til að verja lög og rétt.

Og samdauninn slíkur að allir líta í hina áttina.

 

Skilja svo ekkert í að heimurinn er eins og hann er.

Kveðja að austan.

Eitt ár fyrir kókaínsmygl

Jæja, er Ólafur loksins orðinn elliær??

 

Svona í ljósi þess að hryðjuverkaárásin á Tvíburaturnana var fjármögnuð af Saudum.

Og Saudar fjármagna Ríki Íslams, reyndar ásamt trúbræðrum sínum í Kadar.

Sem og þeir fjármagna allar rætur öfgahyggju vestrænna múslima, öfgahyggju sem á rætur langt aftur í aldir.

Í miðaldahyggju sem er löngu liðin nema í ríki Sauda.

Vissulega eru Saudar ríkir, en þeirra fé er blóðpeningar, svartnætti hins versta sem sagan ein átti að geyma.

 

 

Það er til lítils að gráta hryðjuverkaárásir, en bjóða velkomna rótina sem nærir þær.

Forseti Íslands er létt sama.

Hann hefur ekkert lært af síðasta skriðinu sem hann skreið fyrir aur hinna ofurríku.

 

En það afsakar ekki afskiptaleysi okkar.

The hard way er ekki forsenda lærdómar.

 

Það er ekki sama hver á aurinn.

Kveðja að austan.

Sádi Arabar styrkja byggingu mosku